كلمات شيلة اضرب فجوج الأرض رحال ومقيم سفر الدغيلبي خالد آل بريك
يا ضيفنا فالك معزه وتكريم
بعد النبا الطيب ورفع المكانه
إقلط على واجبك قبل المعازيم
ونعدك اخوا في ضيافة اخوانه
وأنا على المجلس بصدر مراسيم
تنقال من باب الغلا والميانه
توديع واستئذان من دون تقديم
ماني بأشوف لكثر الأعذار خانه
عني يسدون العيال الشغاميم
ربعي هم الصندوق والضيف أمانه
والحاشر التكاك والهم والضيم
الكل منها واصل ازعيتمانه
عند الجماعه والقبيله والإقليم
يعرف سفر من سجته واسرحانه
خلوني اسبح في الخيالات وأهيم
بعيد عن حكم العقل والرزانه
وآخذ من طيور الصحاري ترانيم
بين القطاه ونغمة الدرجلانه
بدا مؤشر حالتي يكسر التيم
لو سولت لي نفسي إني تكانه
لا صحةٍ تذكر ولا زادٍ طعيم
خاشرت مجنون العرب في جنانه
راحن مغاتير الليالي مجاهيم
سودن فلانه نسختن من فلانه
أدور في حلقة مثل حلقة الميم
ماسرني لا قوة ولا ذهانه
احترت في تفسير بعض المفاهيم
يارب عوّض في المعاناه إعانه
هل يعتبر بحر الشعر مشرب الهيم
وشهي ضريبة فوحه وعنفوانه
والشهرة اللي نصف اهلها مظاليم
ما ياخذون من السكينه ذنانه
ياللي هواياتك مقاطع تصاميم
لا تحسب المشهور عنتر زمانه
تراه في ذاته بحاجه لترميم
مهما يخفّي حاجته للصيانه
وانا قصيدي للثكالى المكاظيم
لو ان بعضاً منه سابق لأوانه
أضرب فجوج الارض رحال ومقيم
خلتني الدنيا ورقة إستبانه
ثلاثة أيمان وعلي الملازيم
من طاوله سقمه تحطم كيانه
أستخدم لراسي عقاقير تنويم
العقل خنته بالمنوّم خيانه
واليوم يا أتباع ملة ابراهيم
ما باقيٍ في الشاعر الا لسانه
يارب وردني على عين تسنيم
والكوثر اللي صافيٍ ريهجانه
